Venezuela-in ei tur sem dan ruahmanna thar siam

Venezuela sorkar chuan an ram mipuiten ei leh in tur lama harsatna an tawh mek chinfelna turin ruahmanna thar a siam.

Sorkar chuan ram pawn aṭangin ei tur tam tham tak a la lut tawh tih sawiin, hengte hi chhung­kaw hrang hrang hnenah communal council kaltlangin a sem dawn a ni. Food Minister Rodolfo Marco Torres chuan an rama ei tur zinga 70% chu hetiang hian semchhuah a ni dawn a ni, a ti.

Hetihlai hian eptu lam chuan sorkar ruahmanna thar siam hi sawiselin, eptu pawl­ten thliar hran an hlawh an hlauhthawn thu an sawi.

Venezuela ram hian oil man tlahniam a tuar hle a, chaw lam chi leh damdawi-te an indaih lo nasa hle. President Nicolas Maduro chuan private food production company leh super market-te chu ei tur chheprelhah a puh.

Food Minister Torres chuan sorkarin buhfai, chini, vamin leh bean ton 115,000 a lei thu sawiin, hengte hi ram puma an din, d Local Supply and Production Committees (CLAP) kaltlangin sem an ni dawn tih a sawi. He system thar hnuaia inziak lut, chhungkaw tin hnenah chuan an inah ṭheuh ei turte hi sem an ni dawn a ni.

Ram chhungah chaw lam chi a tam tawk loh avangin lei tur pawhin darkar rei tak tak intlar a ngai a ni.