Israel-in West Bank-ah sipai dah belh

Palestinian mi pahnihten Nilaini-a Tel Aviv-a Israel mi pali an kahhlum hnuah Israel chuan venhimna khauh takin a kalpui nghal a, Palestian ram a luah, West Bank-ah sipai tam zawk a tirh belh nghal. Hei bakah hian Ramadan thlaa Israel ram tlawh tumtu,Muslim mite hnena phalna pek a tum pawh a sut nghal bawk.

Nilaini-a Sarona Market, Tel Aviv-a pawikhawihtute hi Khaled Mohammad Makhamrah, 22 leh Mohamad Ahmad Makhamrah, 21, an ni a, West Bank-a Hebron biala cheng an ni. He pawikhawihna thlen hnu hian West Bank leh Gaza kalpawhnate chu khar nghal a ni a, Israel chuan West Bank-ah hian sipai battalion hnih tirh belh nghal a ni.

Defence official-te chuan Ningani zing khan Muslim-ten Ramadan thla an hman mek chhunga Israel ram tlawh tumtu, Palestiniain mi sang tel hnena special permit an pek chu sut nghal a nih thu an sawi.

Israel defence body, COGAT chuan West Bank-a Palestinian mi 83,000 hnenah Israel rama an chhungte tlawh phalna an pek pawh titawp rih a nih thu a sawi bawk. Hei bakah hian pawikhawihtu pahnih chhungte, mi 204 hnena Israel rama hnathawh phalna an pek tawh an titawp a, Israel chhuahsana Palestinian rama an kal khapsak an ni.

COGAT chuan Israel mi pali thattute chenna, Yatta khua chu chhawmdawl hna thawktu tan leh damlohna thilah chuah luh leh chhuah phal a ni tih a sawi.

Tel Aviv khawpuiah police tam zawk duty tir an ni bawk a, mipui punkhawm tamna bus station leh rel station-te uluk taka ventir an ni.

Prime Minister Benjamin Netanyahu chuan Moscow aṭanga a zin haw veleh pawikhawihna thlenna hmun hi a tlawh a, hma lak dan tur ngaihtuahin official-te a ko khawm a, an zingah hian defence minister thar Avigdor Lieberman pawh a tel. PM chuan, "Palestinian mite pawikhawihna then beih let dan leh inven dan tur kawng hrang hrang kan sawiho a ni" a ti.

Hetih lai hian West Bank leh Gaza Strip-ah chuan mi eng emaw zatin Israel mite beih an nih hi halmawi nen an lo lawm ve thung a, ṭhenkhat chuan a lawmnan kawtthlerah sweet-te an sem kual a ni.