Maldive Vice-President hlui kum 15 tang turin hrem

Maldive Vice President hlui, Ahmed Adeeb chu President Abdulla Yameen-a thah tuma puhna thubuaiah thiam loh chantir a ni a, kum 15 tang tura hrem a ni.

Nikum September thla khan President Abudlla Yameen chuanna lawngah bomb a puak a, President hi a him a ni. He thil thlen aṭanga kar khat hnuah a deputy, Ahmeed Adeeb chu man a ni a, president tihhlum tuma phiarruah puh a ni.

Ningani khan Adeeb hi president thah tuma puh a nihna thubuaiah hian kum 15 tang tura hrem a ni a, hemi hma hian dan loa ralthuam a kawl avangin kum 10 tang turin hrem a lo ni tawh bawk.

Adeeb chuan president chuanna lawnga bomb puakah hian inhnamhnawihna engmah a neih loh thu a sawi. Maldive sorkarin he thil thleng chhuipui tura a sawm zinga pakhat, US Federal Bureau of Investigation chuan bomb puak a awm lo niin a sawi bawk. Mahse sorkar chuan President thah tuma beihna niin a sawi thung.

Court-a a chungthu ngaihtuah dan chu a dik tawk lo hle tih Adeeb chuan a sawi a, a nupui Mariam Nashwa pawhin Adeeb hian thil a sawi chhuah mai an hlauh avangin thutlukna pawh rang takin an siam a ni, a ti. Adeeb-a bodyguard pahnihte chu kum 10 ve ve tang tura hrem an ni bawk.

President Yameen leh a nupui hi nikum September 28 khan Hulhule thliarkar aṭangin airport awmna, Male pana an kal laiin an chuanna speedboat-a bomb nia hriat a puak a, president hi vanneihthlak takin a him a, mahse a nupui leh midang eng emaw zatin hliam an tuar a ni. He thil thlengah hian vice president hlui hi a inrawlh ngei nia sawi zui a ni a, man niin chhuizui nghal a ni.