US President-in Clinton-i a thlawp

US President Barack Obama chuan Ningani khan US President thlanna neih tura Democratic candidate, Hillary Clinton-i a thlawp thu web video hmangin a tichhuak.

He video hi Clinton-i Facabeook page-ah tarlan a ni a, President Obama chuan, "Ani anga president office luah zo leh tlak tur dang hi an awm ka ring lo" a ti. Hillary Clinton-i chu a thlawp tlat tur thu leh, a tana campaign a nghahhlelh tawh thu a sawi.

White House thupuangtu, Josh Earnest chuan Obama leh Clinton-te hi inthlan neihna tura state pawimawh tak, Wisconsin-ah a ṭum khatna atan an inlan dun dawn tih a sawi.

Hetihlai hian Clinton-i khingpui, Vermont Senator Bernie Sanders chuan President Obama'n Clinton a thlawp thu a sawi chu mak a ti lem lo tih a sawi. Sanders hian Clinton hi a thlawp dawn tih a la sawi duh lo a, mahse Republican candidate Donald Trump chu US President a nih lohna turin theihtawp a chhuah tur thu media mite a hrilh.