IS kut aṭangin Sirte port la let

Libya sipaite chuan Islamic State (IS) firfiakte kut aṭangin lawngchawlh hmun khawpui pawi≠mawh, Sirte lak let tumin beihpui an thlak mek a, lawngchawlh hmun chu an la let tawh.

Libya sipai hian khaw≠pui lak let tum hian thla hmasa
aṭang khan beihpui an thlak tawh a, missile hmangin IS hmun pawimawhte chu an kap a ni. Kar kalta chhung khan firfiakte nen nasa taka an inkah hnuah, sipaite hian khawpui hi hualin lawngchawlh hmun hi an la a, khawpui chhungah pawh fir≠fiakte hi an hual chep tawh hle.

Kar hmasa khan si≠paite hian airport chu firfiakte kut aṭangin an la let tawh bawk a, UN thlawp unity sorkar sipaite hian Sirte khawchhunga hmun pawimawh Ougadougou conference centre chu lak tumin an bei leh mek a ni.

Libyan army thupuangtu, Brigadier-General Mohammed al-Ghasri chuan IS-te an beih meknaah British leh US expert-te chuan nasa takin an pui niin a sawi. Firfiakten Sirte khua an lak hnu hian he khawpui chhunga cheng mi 80,000 zet chu an tlanchhe tawh a, mi 30,000 vel an la cheng chhunzawm nia sawi a ni.

Sirte khua hi Libyan dictator hlui, Muammar Gaddafi-a khua a ni. IS hian sipaite kut aṭanga an lak hnuah Sirte hi an pawl hmun pawimawh takah an hmang zui a ni. Libya sipaite hian May 12 aṭangin lak let tumin beihpui an thlak ṭan a, firfiakte nena an inbeihnaah sipai 137 an thi tawh a, 500 velin hliam an tuar tawh bawk niin medical official-te chuan an sawi.