Germany MP-ten vau tawk

Germany rama Parliament member 11-te chuan thaha vauna an tawh avangin police-te venhimna hnuaiah dah nghal an ni. Heng MP 11-te hi an vaiin Turkish thlah an ni.

Ottoman Turks-ten kum 1915-a Armenia mi tam tak an tihhlum chu insuatna rapthlak tak a ni tia sawi a ni a, mahse hei hi Turkey sorkar chuan a pawm ve lo a ni. MP 11-ten Armenia mite suat an nih thu Germany parliament-in resolution a siam chu an thlawp avangin vauna hi an dawng ta a ni.

Germany foreign ministry chuan Tur≠kish thlah MP-te chu an himna atan Turkey rama zin lo turin thurawn a pe nghal bawk.

Turkey President Recep Tayyip Erdogan chuan MP te hi nasa takin a sawisel zui nghal a, "Turkish mi an ni ve meuh em?" tiin zawhna a siam. Heng MP-te hian hnung lamah Turkey mite cu an bei ta nia a ngaih thu sawiin, Turkey ram leh a mipuite hmusitna a ni, a ti. Turkish lawyer-te pawhin German MP 11-t lakah hian complaint an thehlut bawk a ni.

Germany parliament chuan tun thla tir lam khan Armenian mite suat an nih chungchangah Ottoman Turks demna resolution hi a siam a, hei hian Turkey a ti thinur hle a, Germany aṭangin an ambassador pawh an ko haw phah a ni.

Kum 1915-a Indopui I-na hunlaia Ottoman Empire a tlukchhiat dawn khan Turks mite hian Armenian mi maktaduai 1.5 vel an tihlum nia sawi a ni a, mahse Turkey chuan thi zat hi an sawi ai hian an tlem daih nia sawiin, insuatna anga sawi chi pawh a ni lo tiin, thi te pawh hi indonaa thi an ni, a ti.