Nepal PM hluiin party thar din

Nepal Prime Minister hlui Baburam Bhattarai chuan eirukna laka fihlim political party din a tum thu a sawi hnuah, nimin khan Kathmandu-ah a party thar, Naya Shakti-Nepal hawnna inkhawm neih a ni.

Baburam Bhattarai hi kum 1996-2006-a Maoist kaihhruai sorkarah chanvo pawimawh tak a chelh hnuin, kum 2011 August thla khan Prime Minister atan lakluh a ni a, kum 2014 March thla thleng he dinhmun hi a chelh a ni. Kum 2015 November thla khan an party chhunga ngaihdan in ang lo tam tak awm chho zel avangin Unified Communist Party of Nepal ñ Maoist (UCPN) a chhuahsan a, eirukna laka hminghliauna nei lo tur political party a din tur thu a sawi a ni.

Political party thar a din hma hian Naya Shakti think tank a din hmasa a, Nepal ram chhung hmun hrang hrangah zin kualin, mipuite ngaihdan lain an thlawpnate a zawng hmasa phawt a ni. Bhattarai hian a party thar hawnna inkhawma tel tur hian Indian parliament member eng emaw zat a sawm tel a ni.

Bhttari hian Nepal sorkar chanvo pawimawh tak a chelh lai,kum 1996-2006 inkara an ram tualchhung buaina leh tharum thawhna thlengah a hna thawk zo tawk loah puhin sawisel a tawk nasa hle. Sawiseltu ṭhenkhat chuan tuna a party thar din tur pawh hi a lo hminghliau tawhna hrang hrangte paihbo tumna hmanrua niin an puhsak.