Bangladesh-ah mi 3,000 man tawh

Bangladesh Prime Minister Sheikh Hasina kaihhruai sorkarin an rama blogger leh hnam tenau zawkte beihna leh thahna thleng fo tihtawp tura beihpui a thlaknaah mi 3,000 chuang man an ni tawh a, an zingah hian Islamist firfiak nia rinhlelh mi 37 an tel.

PM Sheikh Hasina chuan pawikhawihtu leh tualthattute chu dim an ni dawn lo tih sawiin, khawiah pawh awm se an zawngchhuak ngei dawn tih a sawi. Misualte zawnchhuah chu thil harsa a ni lo tih sawiin, Hasina chuan man an nih hunah an phu ang rorelna pek vek an ni ang, a ti.

Inspector General of Police AKM Shahidul Hoque chuan an rama firfiak pawl leh an zawmpuite manchhuah a, tichhe tur hian kar khat chhung beihpui thlak a nih thu a sawi. Mi 3,192 man tawh zingah mi 1,861-tem an theihna tur thupek chu court-in a tichhuah tawh bawk a ni.

Kum 2013 aṭang khan Bangladesh ramah hian sakhaw intluktlanna leh zalenna chungchang ziaktu, blogger leh publisher-te chu firfiakten beiin kut an thlak bakah an tihlum fo a ni. Nikum aṭang khan hetiang mi hi mi 30 chuang thah an ni tawh a, heng zinga mi 21 chu Islamic State firfiak pawl chuan an tih niin an chhal a, a dangte chu al-Qaida mi leh sate tih nia sawi a ni bawk.

Mahse Bangladesh sorkar chuan an ram chhungah IS firfiak an awm lo niin a sawi thung a, pawikhawihtute chu tualchhunga hel pawl mite niin a sawi. Hasina chuan eng sakhua mahin mi nunna laksak hi a phal lo a, Islam sakhua pawhin hei hi a duh lo a ni, a ti. Hetianga inbeihna thleng ṭhin hi an rama sakhaw hrang hrangte zalenna tihchhiat tumna a ni tiin a sawi.