US Presidential debate-ah Donald Trump a che ṭha

United States President thar chu kumin kum tawp hian thlan a ni dawn a, hemi atan party lian pahnih aiawha ding tur Donald Trump (Republican) leh president nilai mek Joe Biden (Democrats) te chuan Ningani khan debate neiin Donald Trump hi a che ṭha zawka ngaih a ni.

US Presidential debate-a a vawi khatna atan president nilai leh president kal chhuak ta chuan debate hi an nei a, Trump chuan Biden chu US sum dinhmun enkawl chungchanga hlawhchhama a puh bakah khawvel inrelbawlnaa US chakna tlakhniam chhanah a puh bawk. Biden leh Trump hian US chanchina President chhe berah an inpuhtawn ve ve a ni.

President Biden chuan Trump chu an thlang tling a nih chuan President convict hmasak ber White House chuan a nei dawn tiin a sawi. Biden chuan debate-ah hian a duh ang a sawi ṭha thei lo tih a ṭawngdan aṭangin a hriat a, hemi chungchang hi debate zawha thuthar thehdarhtute nen an inkawmnaah sawilangin a hrawk lamah harsatna a nei niin a sawi. US Vice President Kamala Harris pawhin Biden chu debate a che ṭha ṭhin tak a nih thu sawi mah se tuna a chetdan erawh ṭha tawk lo niin a sawi a,"A tir lam khan buai deuh mah se a tawp erawh a khar ṭha viau thung," Harris chuan a ti.

Ningania minute 90 chhung debate an neihah hian Biden emaw Trump emaw hian policy thar an kalpui tur an tarlang lo a, anmahni mimal thil an sawi nasa hle thung a, ṭawngkam pawh an duh tui vak lo. Trump hian economy leh foreign policy record chungchangah Biden hi na takin a bei a, Biden hian Trump chu a thubuaia thiam loh chantir a ni leh, 2020 inthlan result tihdanglam tura puh a nih chungchangah a bei ve bawk. Hruaitu pahnihte hian an hmalak ṭhat lohna leh an tihsualte an insawisak tam hle a, President office an luah huna hma lak an tum dan erawh an sawi lang lo. Democrats hian Joe Biden hi a inhnukdawk a nih loh chuan August thla hian Chicago-ah an candidate atan official-a puan an tum a ni. Republican lam hian July thlaa Milwaukee, Wisconsin-a 2024 Republican National Convention an neihah an party presidential candidate hi official-in an puang tawh a ni.

Biden leh Trump hian President thlan hmain debate vawi khat neih dun leh an remti a, September 10-ah debate vawi hnihna hi an nei leh dawn a, ABC News in a huaihawt ve thung ang. Ningania debate vawi khatna an neih hi CNN, Atlanta in a huaihawt a ni thung. CBS News chuan vice presidential debate chu July 23 emaw, August 13-ah emaw buatsaih a tum bawk a, Biden campaign team lam chuan an remtih thu an sawi tawh a, hetih lai hian Trump hian a vice president candidate tur hi a la puang ve lo.