Indonesia-ah internet kaltlanga inbumna vangin Taiwan mi 100 man

Indonesia police-te chuan nimin khan Bali-ah internet kaltlanga mi bum thubuaiah Taiwan mi 100 chuang an man tih thuneituten an puang.

Bali immigration thuneitute chuan police hnen aṭanga an thudawn bawhzuiin Tabanan Regency-a villa chu Nilaini khan an dap a, he hmunah hian mipa 91 leh hmeichhia 12 chu mobile phone leh electronic device eng emaw zat nen an man ta a ni. Immigration lama thuneitu pakhat, Safar Muhammad Godam chuan ram chhunga luh theihna tur permit pek chhuah leh internet kaltlanga mi bum ṭhinah puh an nih thu a tarlanga, an mi mante hian a tlangpuiin Malaysia lam mite chu an bitum ṭhin niin a sawi.

Indonesia immigration thuneitute hian an hmalakna tur chin a nih loh vangin Taiwan mite lakah hian thubuai an ziak lut thei loa, mahse hemi kaihhnawih buaipuitute nen an thawkho reng tih Godam chuan a sawi. Indonesia ramchhunga mi ni loin ramdang mite an bitum ṭhin avang hian thubuai ziahluh dan tur hriatthiam har an tih thu Godam chuan a sawi bawk. Inbumna thubuaia an mi mante zinga ramdang khua leh tuite chu an ram lamah thawn kir an ni ang.

Southeast Asia-ah hian internet kaltlang inbumna hi a hluar hle a, China, Indonesia leh Malaysia thuneitute chuan hetiang inbumna a reh theih nan hian ngawrh lehzualin hma an la mek a ni.