Iran President thar tur thlang

Iran mipuite chuan nimin khan an ram President thar tur thlangin vote an thlak.

An ram huna zing dar 8 aṭangin vote thlak ṭan a ni a, vote thlak hun hi zan lam thlenga pawhsei a ni. Inthlan result kimchang hi ni hnih hnuah puan theih beisei a ni.

Candidate zingah vote tla aṭanga 50% hmu pha an awm loh chuan, candidate zinga vote hmu sang pahnihten, inthlan result puan aṭanga Zirtawpni hmasa berah inthlan thawh hnihna an hmachhawn leh a ngai ang.

President candidate hi pali an awm a, chungte chu - Mohammad Bagher Ghalibaf; Saeed Jalili; Masoud Pezeshkian; leh Mostafa Pourmohammadi te an ni. An zinga hian Ghalibaf leh Jalili te hi tling tura rinkaite an ni. An pahnih hian conservative ve ve niin, Ghalibaf hi a nem deuh zawk nia sawi a ni. Jalili hi a kalfawr zawk a, Iran hotu lu ber, Ayatollah Khamenei leh paramilitary IRGC nen pawh inzawmna ṭha tak a nei a ni.

Kum 2021-a President thlanna neihah khan vote a tla chhe hle a, 48% vel chauhin vote an thlak a, kum 1979 hnua President thlannaa vote tlakchhiat ber ṭum a ni. Hei vang hian tun ṭum inthlan turah hian thuneitu lam pawhin vote thlak ngei tura sawmna pawh an siam ngawrh hle.