US, Japan leh SKorea sipai drill neih NKorea in a sawisel

United State, Japan leh South Korea chuan Jeju thliarkarah ni thum awh sipai intuaihriamna hun an hmang. He drill hi 'Freedom Edge' tia vuahin, ni thum a awh a, Inrinni liam ta khan an zo a ni. An drill neih hi North Korea chuan a ngaimawh nghal hle.

South Korea Joint Chiefs of Staff chuan an intuaihriamna hun hman chu ram pathumten Indo-Pacific a remna leh muanna awm tura an duhna lantirtu a ni tiin, hemi bakah hian Korean peninsula-ah pawh remna awm tura an duh thu a sawi. Freedom Edge-ah hian ballistic missile defense, air defence, sumarine do let dan, leh cyber war laka inven dan zir ho a ni. Hetiang intuahriamna hun hi kum tin neih an tum a ni.

North Korea chuan ram pathumte hi 'Asian NATO' tia ko el in an thiltih hian rah ṭha lo zawk a chhuah thei tih nimin khan an tarlang. NKorea foreign ministry chuan hetiang intuaihriamna hun an hmang hi an ram vauna angah an ngai tih sawiin an dem takzet niin an sawi. NKorea chuan US leh a thurualpuite chetdan chu an thlithlai reng tih an sawi bawk. An ram himna vawnghim turin hma an la zel dawn tih an sawi a, mahse eng angin nge hma an lak dawn tih erawh an sawi lang lo.

Korea ram pahnihte hi tun hnaiah an inkar a ṭha lo hle a, balloon hmanga bawlhhlawh an inthawn ṭhin bakah au rinna hmangin thuchah an inpuan khum ṭhin bawk.