Russia-in Ukraine a beihnaah mi 12 an thi

Russia chuan Ukraine khaw chhak lam chu Inrinni khan van lam aṭanga beiin mi 12 in nunna an chan. Russia hian tun hnaiah van lam aṭanga Ukraine a beihna hi ngawrh lehzualin a kalpui a ni.

Russia sipaite hian Ukraine rama hmasawnna ruhrel leh eng pek chhuahna hmunte chu an bitum ṭhin a, hetiang an tih chhan chu Ukraine chakna tihnep a tum vang a ni. Russia-in Inrinnia a beihna avang hian Vilniansk khuaah mi pasarih an thi a, Dnipro-ah mi pakhat a thi bawk. Heng bakah hian 20 chuang an awm nia tarlan a ni bawk. Ukrainian President Volodymyr Zelenskyy chuan Dnipro beihna chu Ukraine ṭhianṭha ramte chuan air defence system ṭha zawk an mamawh zia hriattirtu ni se a duh thu a sawi.

Ukraine Air Force chuan Inrinni khan Russian drone 10 an kapthla tih an puang. Russia hian drone leh missile hmanga a beih ṭhin avang hian air defence system ṭha zawk mamawhna a sang hle a ni. "Russia in min beihna hi Khawvel ramdang ṭangrual chauhin a titawpthei a ni," Zelenskyy chuan a ti. Russia hian darkar 24 chhungin mihring tamna lai hmun 13 chuang a bei hman nia tarlan a ni bawk.

Ukraine hian Russia hi drone leh thildang hmangin a bei ve reng bawk a, kar hmasa kar tawp lam khan ramria Russia lam khaw ṭhenkhat chu drone hmangin an bei a ni. Russia-Ukraine ramria khaw pakhat, Gorodishche chu drone hmanga beih niin mi panga an thi niin Russia thuneitute chuan Inrinni khan an tarlang. Kursk region Governor, Alexey Smirnov chuan thi zingah hian naupang pahnih an tel a ni, a ti. Russian Defence Ministry chuan Ukraine drone paruk Tver, Bryansk leh Belgorod-ahte an kap thla tih an puang ve bawk.