Kenya mipuite nawrh huaihawta thi mi 30 an chuang

Human Rights Watch (HRW) chuan thuchhuah siamin, Kenya sorkarin chhiah tihpun a tumna duh loh vanga nawrh huaihawtnaa thi chu mi 30 chuang an ni tih a tarlang.

HRW chuan Kenyan security force te chuan lungawi lo pung khawmte chu Thawhlehni khan an kap tih tarlangin mipui hlaua tlanchhiate pawh an zuah lo a ni, a ti. Mita hmutu, damdawi-in leh Nairobi a mitthi zat chhinchhiahna hmun aṭanga an chhut danin thi zat hi 30 chu a kai ngei niin an sawi.

Kenya National Commission on Human Rights chuan nawrh huaihawt zinga thi hi mi 22 niin hliam 300 an awm niin a tarlang ve thung. HRW Associate Africa director, Otsieno Namwayaan chuan Kenya leh khawvel danah mipui pung khawm lam hawia silai hmeh puah hi dan bawhchhiatna a nih thu leh mipui tlanchhe lai kah chu pawm theih a nih loh thu a tarlang.

Namwaya chuan Kenya sorkar chuan a police-te chu ralmuang taka nawrh huaihawttute chu venghim tura hrilh zawk tura a duh thu sawiin, hetiang thil dik lo ti ṭhin an him zel hi hriatthiam harsa a tih thu a sawi. Thawhlehnia thil thleng hi Kenya rorelna-in chuan chhiah tihpunna tur bill lut a pawm vang niin mipui lamin hei hi an hriat hnuah Parliament hungchhungah luh tumin police leh mipui lam hi an innawr buai ta a ni. Kenya president William Ruto chuan mipuiten an duh lo vangin bill hi a pawm ta lo a ni.

Kenya ram hian leiba a ngah avangin International Monetary Fund (IMF) chuan an ram sum dinhmun siamṭha turin Kenya sorkar chu an nawr a, hetiang an ti a nih chuan pawisa tam zawk an puk belh thei dawn niin IMF chuan a hrilh. Kenya sorkar hian chhiah tihpun hmangin a leiba ṭhenkhat rulh a tum bakah ramdang aṭanga sum puk tihtlem a tum a ni. Mahse mipui lam nawrna a nasat em avangin chhiah tihpun tumna hi sut niin bill hi President chuan a pawmpui ta lo a ni.