South Africa-ah ṭangrual sorkar a thar a piang
South Africa president Cyril Ramaphosa chuan Pathianni khan zan khan party dangte nen ṭangural sorkar siam turin an inrem tih a puang. Cabinet minister post an insem dan turah inremna nei lawk thei lo mah se ṭangrual sorkar siam turin inremna an nei thei ta a ni.
President Ramaphosa party, African National Congress (ANC) chuan cabinet minister post 32 aṭangin 20 an chang a, an chang tam ber dawn a ni. ANC thawhpui zingah Democratic Alliance (DA) chuan an party aṭangin minister paruk an nei dawn a, a bak post dang la awmte chu party dangte tan sem a ni ve bawk. ANC hian kum 30 hnuah sorkarna siam tura party mala hnehna an chan zawh loh vangin party dang ṭanrualpui tur an zawn a ngai ta a ni.
ANC hian Parliament-a party 18 te chu sorkarna siampuiah hian a sawm a, party 10 in an sawmna hi an pawm a ni. Ramaphosa party, ANC hian an president ṭanglai thlan nawn leh an duh a nih chuan party dang ṭanpuina a ngaih vangin Parliament-a majority neih nan party dangte hi an thawhpui ta a ni. Ramaphosa chuan mipui intluktlang lo lutuk leh hna nei lo tam lutuk vanga an buaina chu ṭangrual sorkar chuan a ngai pawimawh hmasa ber dawn tih a sawi.
South Africa-a ṭangrual sorkar thar piangah hian party 11 awm mahse ANC leh DA chu party lian pahnih niin minister post insem dan turah inbiakna an nei rei hle a, kar liamta Zirtawpni khan DA hotupa John Steenhuisen leh Ramaphosa te chuan inbiakna neiin an buaina hi an ching fel thei ta chauh a ni. President Ramaphosa chuan harsatna an neihte chu inbiakna hmanga chin fel theih a ni tih an lantir nia a hriat thu a sawi. Ṭangrual sorkara party zawng zawngte chuan ram inrelbawlnaah awmze neia tha an tawh ve a duh vangin party dang pali hotute chu minister post a pe tih a sawi bawk.
Kum 1994 khan South Africa-ah hian ṭangrual sorkar a lo ding tawh bawk. Hemi ṭum hian ANC hi party mala sorkar siam thei turin chak mah se, hetih hunlaia ANC hotu Nelson Mandela chuan party dangte chu a kaihhruai sorkar zawm turin a sawm a, ṭangrual sorkar a din a ni.