EU President thar Hungary in rin a hlawh lo

European Union (EU) chuan thla ruk dana President dinhmun chelh tur ram an inthlak ṭhin chu Thawhṭanni khan thlengin, Hungary President nih hun a inher chhuak ta a ni. Hungary hi Russia ṭhianṭha ram an nih vangin rin an hlawh lo hle a, mahse Hungary chuan kaihruaitu rinawm tak nih an tum thu an sawi thung.

Hungary hi kum 2010 aṭang khan nationalist prime minister Viktor Orban chuan a kaihruai a, dan leh hrai kenkawh chungchang leh mihring dikna chanvo humhim chungchangah EU nen hian buaina an nei fo a ni. Hungary hian Russia-in Ukraine a run hnuah an inlaichinna a la chhu chat ve lo a, PM Orban hian Ukraine tan ralthuam a pek duh loh bakah EU-in Russia a hrekna pawh na takin a sawisel ṭhin a ni.

European Parliament hian nikum khan Hungary hi President nihna chelh turin mipui sorkar tundin a duh tak tak em tiin zawhna a siam a, Hungary chuan EU President mawhphurhna chu ṭha taka an hlen chhuah theih an inring tiin an chhang. Hungarian EU Affairs Minister, Janos Boka chuan kumin June thla laihawl khan EU President nihna an chelh hunah chuan kaihhruaitu rinawm tak ni tura a intiam bakah EU ramte leh a hnuaia pawl hrang hrang chu ṭha taka thawhpui a intiam bawk. Hungrary hi kum 2011 hnua EU President nihna an chelh leh hmasakna ber tur niin Belgium chu an thlak a ni.