Hezbollah-in drone hmanga a beihnaah Israel sipai 18 an hliam

Lebanon helpawl, Hezbollah chuan Pathianni khan Israel hmar lam chu drone hmangin an bei a, Israel sipai 18 in hliam an tuar a, an zinga pakhat chu a dinhmun a ṭha lo hle niin Israel Defence Force (IDF) chuan a sawi.

IDF chuan Hezbollah hian Pathianni chawhnu lam khan Lebanon aṭangin Galilee Panhandle leh Golan Height hmar lam an bei tih a sawi. Puak thei thil phurtu dorne chuan Melrom Golan area fuhin, sipai 18 hian hliam an tuar phah a ni. Pathianni vek khan Hezbollah hian rocket hmangin Beit Hillel area an bei bawk a, mahse ram ruakah a tlak avangin thil tih chhiat a nei lo.

Israel sipaiten nikum October 7-a an ram beitu, Palestinian firfiak pawl, Hamas laka beihpui an thlak hnuah, Hezbollah hian Hamas an thlawpna lantirin Israel hmar lam hi an lo bei zui ve nghal a ni. Nikum October 8 aṭang khan nitin deuhthaw an ramri bula Israel mi awmte leh military post-te an bei a, Israel civil mi 10 an thi tawh a, hemi bakah hian IDF sipai leh reservist 15 an thi tawh bawk. Syria lam aṭang pawhin Israel hian beih a tawk fo a, mahse pawi khawihna lian tak erawh a thlen lo.

Hezbollah chuan Israel nena an inbeih meknaah hian an mi leh sa 356 an thi tawh niin a sawi a, a tam zawk chu Lebanon chhungah niin, ṭhenkhat chu Syria-a mi an ni. Hezbollah ten Israel an beih ngawrh chhoh zel avangin, Israel pawhin an ram hmar lam ramriah hian sipai tam zawk dah a tum a ni. Palaite inbiakna hmanga an buaina chu an chinfel theih loh chuan, sipai chakna hmanga nawr a tum tih a sawi.