Beijing-ah Mask hman ngai tawh lo
China khawpui, Beijing-a health thuneitute chuan khawpui chhungah ni 13 chhung a zawna hri kai hmuh thar an awm tawh loh avangin khuahkhirhna a siam a thlahdul zel a, mipuite tan pawn an chhuahin hmai tuamna, face mask hman kher a ngai tawh lo tih nimin khan an sawi.
Thuneitu lamin khuahkhirhna hi thlah dul mah se, nimin khan Beijing khawpuia pawn chhuak mi tam zawk chuan mask hi an la vuah tho a ni. Beijing municipal Centers for Disease Control chuan April thla tawp lam khan pawn chhuahnaah mask hman kher a ngai tawh lo tiin thupek an lo siam tawh bawk a, mahse June thlaah khawpui chhunga wholesale market-ah hri kai hmuh thar an awm leh avangin thupek a thlahdul hi a sut leh nghal a ni.
China mainland-ah hian ni nga chhung chu tualchhungah hri kai awm thar an awm tawh lo a, Beijing bikah chuan ni 13 chhung an awm tawh lo bawk. Covid-19 len ṭanna, China ramin hlawhtling taka hri leng a khuahkhirh theih chhan hi tualchhunga dan khauh tak siam a, mask vuah ngei ngei tur leh ina inkhung hran ngei ngeina tur dan a kenkawh vang niin mithiamte chuan an sawi. Hei bakah hian mass testing neih chu a hlawhtlinna pakhat niin an sawi bawk a ni.
August 20 khan ram pawn aṭanga lut mi 22 te chu hri an kai tih hriat leh ni a, hei vang hian Chinese ni lo tan chuan ramri te khar zui a ni. Hri a len ṭantirh aṭangin China ramah hian hri kai hmuh chhuah tawh mi 84,917 an awm.