WHO-in school hawn hmain a him tawk em tih ngaihtuah turin ngen
World Health Organisation (WHO) chuan Africa ramte hnenah an rama zirna inte an hawn hmain, Covid-19 leng mek lakah an him tawk em tih ngaihtuah phawt turin a ngen.
WHO-in tun hnaia Sub-Saharan African ram 39-a survey a neihah, ram parukah chuan school hi dan pangngai anga hawn ni tawhin, ram 14-ah chuan khar an la ni. Ram 19-te chuan zirlaite examination an hmachhawn theihna turin school ṭhenkhat an hawng bawk.
Africa ram 10-te chuan an rama academic year thar, September thlaah school hawn an tum thu an sawi bawk a ni. WHO Regional Director for Africa Matshidiso Moeti chuan, Africa ramte chuan school an hawng a nih pawhin, hri darh tur venna khuahkhirhna siamte chu khauh taka an kenkawh a ngai tih a sawi.