Biden-a'n Democratic nomination a pawm

US-a Democratic National Convention tawp zan, an ram huna Ningani zan khan Joe Biden chuan US president thlanna neih tura Democratic president candidate atana nominate a nihna chu a pawm. 

Nomination a pawm­naa thu a sawiah, Joe Biden chuan an ram president nilai hnuaiah America chu hun thim tak hnuaiah rei tak a awm ta tih sawiin, President atana thlan tlin a nih chuan America ṭhatna pho chhuakin, kawng eng lamah hruaitu a nih tur thu a sawi. Mipuite ṭangruala an thawhho a hun ta tih a sawi. 

Biden chuan Presi­dent atana thlan tlin a nih chuan a hmalakna hmasa ber tur chu an rama coro­navirus leng mek khuah­khirh a nih theih nan a thawk dawn tih a sawi. US hi Covid-19 kai tamna leh hripui vanga thi tamna ber ram a la ni zel a, he hripui vang hian mi 1,70,000  chuangin nunna an chan tawh a, mi maktaduai nga chuangin hri hi an kai tawh bawk. 

Joe Biden hian party president chuh tumin a hma pawhin alo bei tawh a, kum 32 hnuah a ni thei a ni. Kum 1987 leh 2008 khan Democratic president candidate nih tumin a lo bei tawh a, mahse a tling pha lo ve ve a ni.