Orlando nightclub beihnaah mi 50 thi IS-in an tih niin an chhal
Islamic State (IS) firfiak pawl chuan Pathianni-a Orlando, Florida-a gay nightclub-a mi 50 zet kaphlumtu chu IS fighter a ni tih an sawi. He pawikhawihna hi inpawngkahna thleng tawh zing≠ah a rapthlak ber nia sawi a ni.
Pathianni zinglam khan US-a Orlando khuaa gay nightclub, Pulse club-a awmte chu kum 29 mi, Omar Mateen chuan a pawng kah a, mi 50 a kap hlum a, police-te chuan hliam tuar mi 53 an awm tih an sawi. Pawikhawihtu hi police-ten an kaphlum ve leh nghal a ni. Nightclub beih a nih lai hian a chhungah mi 300 chuang an awm a ni.
Pawikhawihtu Mateen hi Afghan thlah, US citizen nei a ni a, New York-a piang niin, Florida-a cheng a ni. Tun hma lamin firfiaka chetna hawi zawnga inhnamhnawihna a neih hriat a ni lo. Mahse official-te chuan kum 2013-14 khan FBI chuan a thawhpuite laka ṭawngkam mawi lo tak a hman avangin ṭum hnih thu an lo zawtfiah tawh a, mahse a thubuai erawh tihtawp zui a ni tih an sawi.
Orlando Police Chief John Mina chuan Mateen hian rua≠hman fel sa thlapin nightclub hi a bei nia a lan thu a sawi a, thurualpui a neih awm hriat a nih loh thu a sawi. Nightclub-a a awm lai hian bathroom aṭangin emergency number 911 a bia a, a hming pumte hrilhin, IS laka rinawmna thu tiamte a tiam niin official-te chuan an sawi bawk.
Mateen hi khawvela private security company lian ber zinga mi, G4S hnuaiah kum kua a thawk tawh a, a hna atana a ṭul avangin silai pawh a keng ṭhin a ni. Kar hnih liamtaah pawh khan dan ang thlapin Glock pistol leh long gun a lei. Company chuan kum 2007 leh 2013 khan Mateen dinhmun hi enfiah a ni leh a, harsatna a neih hriat a ni lo tih a tarlang. Mahse a nupui hlui chuan hun rei lote an inneih chhungin kut a thlak hman fo nia sawiin, a thinchhiain thil ho teah pawh a thin a ur phut zel niin a sawi.
Pawikhawihna rapthlak tak thlen hnu hian Orlando leh Orange County-ah state of emergency puan nghal a ni a, Pathianni zan dar 6 khan nightclub beihnaa thi te sunna hi hmun hrang hrangah neih a ni bawk. New York-a Empire State bulding chu mitthi te sun nan tih thim a ni a, One Trade Centre chu gay pride flag rawnga tihen a ni thung.
US President Barack Obama chuan nightclub-a pawikhawihna rapthlak tak thleng chu a dem thu sawiin, an rama silai khuah≠khirhna khauh zawk siam tura a beih meknaah thutlukna dik tak a siam a ngaihzia a lantir tih a sawi nghal bawk. President hian mitthite sunna atan Ningani khian ni tlak hma chu sorkar building hrang hrangah hnam puanzar a ngul chanve-a zar turin a ti bawk.
UN Secretary General Ban Ki-moon pawhin Orlando-a pawikhawihna thleng chu a dem thu a sawi a, thi chhungte leh hliam tuarte bakah, US sorkar a tawrhpui thu a sawi.
US-a inpawngkahna thleng lian zualte
ν US-ah hian inpawng kahna hi a thleng fo a, heng zinga thihna thlen tam zualnate chu -
ν 2016 - Omar Mateen-an Olrando, Florida gay club-a silai pawng kahin mi 50 a kaphlum.
ν 2015 - Syed Rizwan Farook leh Tashfeen Malik-ten San Bernardino-a staff awmkhawm an pawng kah a, mi 14 an thi.
ν 2012 - Adam Lanza chuan Sandy Hook, Connecticut-ah silai pawng kahin, naupang kum 6-7 inkar mi 20 leh puilting paruk a kaphlum a, amah a inkaphlum nghal bawk.
ν 2009 - Maj Nidal Malik Hasan chuan Ford Hood, Texas-a army base-ah silai hmetpuakin mi 13 an thi.
ν 2007 - Virginia Tech University-ah zirlai pakhat, Seung-Hui Cho chuan mi 32 a kaphlum a, amah a inkaphlum zui ve nghal bawk.
ν 2009 - Jiverly Wong chuan New York immigrant centre-ah silai pawng kahin mi 13 a kaphlum a, amah a inkaphlum nghal bawk.
ν 1999 - Eric Harris leh Dylan Klebold-te chuan Littleton, Colorado-a Columbine High School-a zirlai leh zirtirtute pawng kahin, mi 13 an kaphlum.
ν Nikum chhung khan US-ah inpawngkahna ṭum 372 zet a thleng a, pawikhawihna thleng vanga thi mi 475 awmin, mi 1,870 in hliam an tuar a ni.