Taiwan president hlui Hong Kong-a zin khapsak

Taiwan president thar, Tsai Ing-wen-i kaihhruai sorkar chuan an ram president hlui, Ma Ying-jeou chu Hong Kong-a a zin a khapsak.

Kumin January thlaa Taiwan president atana thlan thar, Tsai Ing-wen leh a party, Democratic Progressive Party (DPP) hi China lak aṭanga inlakhran thlawptu an ni. Hong Kong hi China rorelna hnuaia awm a, President hlui Ma hi Society of Publishers in Asia buatsaih, Asia media awards ceremony-ah thu sawi tura sawm a ni.

Taiwan sorkar chuan national security thil avangin President hlui hi Hong Kong-a zin khapsak a nih thu a sawi. Mahse eptu pawl, Nationalist Party chuan hei hi sawiselin, Taiwan internal politics leh khawtlang boruak muanawmna tichhe thei thil a nih thu a sawi.

Hetih lai hian Presidential Ofice chuan thuchhuah siamin, Taiwan security dinhmun te ngaihtuahin, Hong Kong chu sensitive area a nih avangin President hlui zin tur hi khapsak a nih thu a sawi. Taiwan leh Hong Kong thuneitute hian President hlui zinna tura venhimna lam buaipui turin hun an nei ṭha lo niin a sawi.