IDF-in Khan Younis chhuahsan turin civil mite hriattir

Israel Defence Force (IDF) chuan Gaza Strip chhim lam, Khan Younis khawpui aṭanga Israel beihna tur rocket eng emaw zat kah chhuah a nih leh tak avangin, na zawka beihpui thlak an tum. Hei vang hian heng hmuna cheng, civil mite chu an awmna hmun chhuahsan turin an hrilh.

Thuchhuah an siamah, Israel sipai chuan Palestinian civil mite chu 'humanitarian zone' an siam lama insaseng turin an ti a ni. Israel sipaite hi Khan Younis-ah hian Hamas firfiak laka thla li zet beihpui an thlak hnuah, April thla khan an inla chhuak a ni. Mahse heng hmun aṭanga Israel ram beih a nih leh tak avangin a khaw pumpui ang ni loin, firfiak pawlte chet tlatna lai nia hriatahte chuan beihpui hi an thlak leh ṭan a ni.

IDF Arabic-language thupuangtu, Col. Avichay Adraee chuan sipaite bitum tur, civil mite inthiarchhuahna tur hmun list tichhuakin, heng zingah hian Khan Younis khaw dai, al-Qarara leh bani Shuheila bakah Abasan bial leh Khuza'a khuate a tel.

Palestinian Islamic Jihad chuan Khan Younis aṭang hian Israel chhim lam ramri bul chu rocket 20 velin an kap a, an beihna hi IDF chuan chhan let ngei an tum a, hei vang hian civil mite chu insaseng turin a hriattir hmasa ta a ni.

IDF chuan Gaza Strip chhim lama Rafah khawpuia Islamic Jihad-te rocket siamna hmunpui an hmu chhuak a, an tichhe nghal tih an sawi bawk. Commando Brigade, 401st Armored Brigade leh Yahalom combat engineering unit chuan Rafah hmarlam, Tel Sultan venga Islamic Jihad compound leh leihnuaia an hmun siamte hi an hmu chhuak a, heng hmunah hian firfiak pawlin rocket an siamna hmanruate an hmu a ni. Kum eng emaw chen chu he hmun hi rocket za tel siamna atan an lo hmang tawh niin IDF chuan a tarlang.

Central Gaza-ah pawh Israel sipaite hian Netzarim Corridor area-ah Palestinian firfiak pawl leiverh siam an hmu chhuak bawk. He leiverh hi Yahalom combat engineering unit-in an ti chhe nghal a ni. He bialah hian sipaite hian thla hnih chhungin firfiak pawl mi leh sa eng emaw zat an lo thah tawh bakah, an hmunhma 100 chuang an lo tichhe tawh bawk a ni.