Joe Biden-a'n US Supreme Court rorel a sawisel

US Supreme Court-in Thawhṭanni khan Donald Trump chu US president a nih laia a thubuaiah, president a nihna anga a hmalaknaah a nihna chelh chuan a humhim thei tia thutlukna a siam chu a khingpui Joe Biden chuan na takin a sawisel. Hetianga president humhim theih chungchanga rorelna tihchhuah hi a ṭum khatna a ni.

Joe Biden chuan US Supreme Court thutlukna chuan Trump chu chak angah a inngaihtir thei dawn a ni tiin, America ram innghahna chu mi zawng zawng intluktlanna a ni a, hemi bulṭhuta hmang hian America ram chu din a ni tih a sawi bawk. Biden chuan dan chunga leng tumah an awm lo tih sawi nawn lehin, heihi "SC thutlukna chuan a thlak danglam hlawk" a ti bawk. Supreme Court hian Trump hi president a nihna anga a hmalaknaah rorel sak thei lo mah se mimal thil a tihah erawh rorel sak theih a ni tih a tarlang thung.

SC rorel chungchang a sawilan hi Biden-a'n Trump nena debate an neih hnua mipui hmaa thuchhuah a neih leh hmasakna ber a ni. Debate-ah khan a chet ṭhat loh vangin mi tam tak chuan Democrats aiawha ding lo mai turin Biden hi an ngen a, mahse hetia a khingpui ber a beih leh tak avang hian kum tawpa president inthlan chu chuh ngei a la tum tih a hriat theih awm e. Joe Biden chuan Court-in rorelsak dawn lo mah se mipuite chu an vote hmanga Trump chu rorelsak turin a chah a ni.

Donald Trump hi kum 2020 inthlana a chak zawh loh vangin result her danglam tumah puh niin thubuai a nei a, amah thlawptuten US Capitol luhchilh an tumnaah inrawlhna neia puh a ni bawk. He thubuaiah hian president a nihna chuan a humhim thei tiin SC chuan thutlukna a siam a, kumtawp inthlanah pawh a chuh ngei a rinawm. Mahse New York Court chuan kumin May 30 khan mipat-hmeichhiatna hman khaw loh thubuai a neih chungchang, kum 2016 inthlan dawna a record aṭanga a thup vangin thiam loh a chantir tawh thung a, a hremna tur hi kar leh Ningani khian a ngaihtuah dawn a ni.