Taliban-in ram dangten Afghanistan an hrekna tinep turin nawr dawn

Qatar khawpui, Doha-a UN kaihhruaia summit neih mekah a vawi khat nan Taliban chuan palai an tir a, Taliban hotute chuan khawvel ram dangte chu Afghanistan laka hrekna an siamte hlip turin an ngen dawn tih an sawi.

Afghanistan Foreign Ministry official, Zakir Jalaly chuan he summit hi sum leh pai bakah bank lama hrekna an chunga lekkawh mekte chungchang sawi chhuah nan hman an tum thu sawiin, Afghanistan ramchhung sum dinhmunin harsatna a tawh sawi nan hman an tum bawk tih a sawi.

Taliban palai zinga an hotu, Zabihullah Mujahid chuan UN hotute leh ram hrang 20 aṭanga palai kalte hmaah thu sawiin, an ram mipuite chuan khawvel ram dangten hrekna hmanga an beihrawn ṭhin chhan zawhna an neih thu leh, hrekna an hmachhawn mek chu thil dik a ni em tiin zawhna a siam a ni.

Taliban-in Afghanistan an awp leh hnuah khawvel ram zingah Afghanistan roreltu anga pawm an la awm lo a, Islam sakhaw dan khauh taka an kenkawh avangin hmeichhiate dikna chanvo rahbeh sak an nih avangin UN chuan a sawisel fo bawk.

Doha-a UN kaihhruai summit neihah hian hmeichhe dikna chanvo humhimtu pawlte leh NGO telh an nih loh vangin sawiselna a nasa hle. Taliban palaite chuan an khua leh tuite dikna chuan Islam danin a pek ang chiah dikna chanvo an nei tih an sawi a, Mujahid chuan khawthlang ramte chu inlaichinna ṭha zawk neihpui an inpeih tih a sawi bawk.