Israel-in inkahhai puang tura ruahmanna a zirchiang mek : Mossad

Israel chuan Gaza-a inkahhai puang tura Hamas lam rawtna thlen chu an zirchiang mek tih Israel spy agency, Mossad chuan a tarlang. Hamas lam ruahmanna thlen zingah hian inkahhai puan mai bakah mitang chhuah pawh a tel tih tarlan a ni.

Israel prime minister office chuan Mossad aiawha thuchhuah siamin, inremna neih theih nana Israel leh Hamas inkara palai hna thawktuten mitang chhuah chungchanga Hamas chhanna chu Israel hnenah pein anni hian an zirchiang mek a, palaite hnenah hian an chhanna an thehlut thuai dawn tih an sawi. He thuchhuah hian inremna chungchang leh Hamas lam rawtna chu eng chiah nge a nih tih a tarlang lo thung.

Israel leh Hamas inkara inkahhai puan a nih theih nan hian Egypt, Qatar leh US te chuan palai hna an thawk a, Gaza-a remna a awm theih nan leh Hamas mi hren 120 te chhuah an nih theih nan anni hian hma an la a, ṭum tam tak meeting pawh an nei tawh a ni. Hamas lam hian inremna an nei dawn a nih chuan Gaza aṭanga Israel inhnuhdawh an phut laiin, Israel chuan inkahhai lailawk neih an duh thung a, Hamas nuai chimih an nih hma chu Gaza a beihpui an thlak hi tawpsan an tum lo thung. Heng a nih avang hian inremna an nei thei lo a, mahse palai ramte chuan hma an sawn zela an hriat vang leh Gaza mipuite tawrhna a nasat zel avangin inremna neihtir ngei tum hian hma an la ve reng a ni.