Finland-in an sipai hmun US hman a phalsak, Russia-in chhanlet a tiam

Finland Parliament chuan United States nena December, 2023 a inremna an lo ziah tawh angin, an ram sipai hmun 15 chu US hman phalsak tura inremna chu Thawhṭanni khan a pawmpui. He inremna hmang hian US chuan a sipaite bakah an ralthuamte chu Finland-ah hian a dah thei dawn a ni.

Finland ṭhenawm, Russia chuan US leh Finland inremna hi a helh hle a, Finland Parliament thutlukna chu an chhanglet ngei dawn tih a puang.

Russia foreign ministry thupuangtu, Andrei Nastasin chuan NATO hnuaia ram inzawmkhawmten Russia ramria sipai an dah chu chhanlet ngei an tum tih a sawi a, hetiang hmalakna hi Russia himna tiderthawng thei thil a nih thu a sawi bawk. "A ṭul angin hma kan la anga, sipai hmanga hmalakna pawh Finland leh NATO hnuaia an thawhpuiten mi cho chhuak zawnga an hmalak vangin chhanletna kan nei ang" a ti bawk.

Russia-in Ukraine a rûn hnuah Russia ṭhenawm khawthlang ramte nena inlaichinna nei ṭhate chuan an ram venhim an ngaipawimawh thar hle. Finland leh Russia inkarah hian ramri km 1,300 a thui a awm a, hei vang hian he inremna hi Finland him nan a pawimawh tih hriain Parliament chuan a pawm ta a ni.

Finland hian an ram chhunga nuclear ralthuam lakluh a khap avangin US nena an inremnaah pawh hian nuclear ralthuam lakluh a nih lohna tur pawh an ziak tel niin an tarlang. An ram zalenna, dan leh khawvel danin a phal chinte uluk taka ngaihtuah a nih hnuah US nen hian inremna hi ziah a nih thu an tarlang bawk.