President Joe Biden-a'n inhnuhdawh a tum lo

US President thlanna neih tura Democractic Party nominee, president ni lai Joe Biden chuan presidential debate hmasa berah a chet ṭhat tawk loh avangin inthlan a chuh tur aṭanga inhnuhdawk mai tura nawrna a awm a, mahse Biden hian inhnuhdawh a tum lo. 'He intihsiaknaah hian a tawp thlengin ka tel dawn,' tiin, Democratic Party nominee a ni tih a sawi lang bawk.

President Biden chuan, 'Demoratic Party nominee ka ni a, tumahin min nawr chhuak dawn lo. Ka chawl dawn lo a, a tawp thlengin ka tel dawn a, inthlanah hian hnehna kan chang ngei bawk ang. Hei hi in duh anih chuan, kei leh vice president Harris puihna tur leh, Donald Trump hneh a nihna turin in sum te lo thawh rawh u,' tiin fund raising mail an neihnaah a sawi.

June 27, 2024-a Atlanta-a Joe Biden leh Republican candidate, Donald Trump ten presidential debate an neihah khan Biden hi a che ṭha lo hle a, debate zawh hnu hian a approval ratings pawh a tlahniam nghal a ni. Hei vang hian an party mi leh sa zingah ngei pawh a tlin zawh loh hlauthawng an awm nual tawh a ni.

Biden chuan kum 2020 ang bawk khan kumin November thlaa inthlan an neih turah Democrats chuan Trump chu an hneh leh ngei dawn tih a sawi a, 'Mahse thil awlsam tak a ni dawn lo a, hei vang hian in mi puihna pawh ka mamawh hle,' tiin amah thlawptu kalkhawmte aamh pui turin a sawm.

White House press secretary Karine Jean-Pierre pawhin Biden hian president thlanna neih tur aṭanga inhnuhdawh a tum loh thu a sawi bawk. Debate neih takah an beisei angin a che ṭha tawk lo tih chu a hriat thu pawh sawiin, mipuiin an ngaihdan an sawichhuah pawh chu a hrethiam hle a ni, a ti. Hemi rual hian a record lo nei tawhte chu theihnghilh sak mai chi a ni lo a, kum li dawn America mipuite tana a lo thawh tawh dante chu an hriat sak a ngai a ni, a ti.

President-a thlan tlin leh anih chuan Biden hi kum 81 mi niin, America chanchina President atana lakluh upa ber a ni ang.