UK inthlanpuiah Labour Party an chak; Prime Minister thar tur Sir Keir Starmer

UK inthlanpui neih zawh takah eptu pawl, Labour Party chuan prime minister Rishi Sunak kaihhruai Conservative Party an hneh a, kum 14 hnuah Conservative rorelna chu an titawp dawn ta. Labour Party hotu Keir Starmer chu Britain prime minister thar a ni dawn.

Labour Party-in sorkarna siam tura seat 650 awmna, House of Commons-a seat 326 lak ngai an tlin tih hriat a nih veleh, prime minister Rishi Sunak chuan an chak loh an pawm thu puangin, a hnuah Conservative Party hruaitu a nihna aṭangin banna a thehlut nghal a ni. Labour Party hian UK lower house of parliament, House of Commons-ah hian seat 412 zet an la pha a ni. Hei hi kum 1997 hnua an party chet ṭhat ber ṭum a ni a, hetih lai hian Conservative Party chet chhiat ber ṭum a ni ve thung.

UK prime minister thar tur Sir Keir Starmer hi September 2, 1962-a piang niin, kum 2020 aṭang khan Labour Party leader a ni. Kum 2015 aṭangin Member of Parliament a ni a, 2020-2024 chhung khan Parliament-ah Leader of Opposition a ni. Kumin inthlanpuia an party-in hnehna an chan tak avangin kum 2010 hnuah UK Labour prime minister hmasa ber a ni dawn ta a ni. Kum 2014 kha Director of Public Prosecutions (DPP) leh Head of the Crown Prosecution Service (CPS) a nih laia law and cirminal justice lama a hnathawh ṭhat avangin chawimawina, Knight Commander of the Order of the Bath hlan niin, 'Sir' title pek a lo ni tawh a ni. Kum 61 chhunga knight ni thei zinga UK PM hmasa ber a ni dawn a ni.