Hezbollah-in Israel lamah rocket 200 chuang an kap

Lebanon-a inkhuar, Hezbollah helpawl chuan Ningani khan Israel lam hawiin rocket 200 chuang an kap chhuak tih an puang. Hezbollah chuan Israel in an pawl commander pakhat an kah hlum chhan let nan rocket hmang hian Israel military base chu an bitum tih an sawi.

Iran thlawp Hezbollah helpawl hian tun hnaia Israel a beihnaah Ningania rocket 200 chuang a kah chhuah hi a tam ber ṭum a ni. Israel sipaite chuan rocket 200 vel bawr kah chhuah leh drone 20 chu Israel ram bei tura kah chhuah an ni tih tarlangin, heng zinga a tam zawk chu an kap chhe hman tih an tarlang. Hezbollah rocket kah chhuah vang hian thi leh hliam an awm lo nia tarlan a ni bawk.

Israel hian Hezbollah beihna hi chhang let ve nghalin Lebanon chhim lama Hezbollah sipai hmunte chu an kap ve niin an tarlang. Ramria khaw pahnih Ramyeh leh Houla chu Israel sipaiten an kap tih Lebanon sorkar hnuaia awm, National News Agency chuan an sawi a, Houla-ah mi pakhat a thi niin an tarlang. Israel hian Nilaini khan Hezbollah sipai commander pakhat Mohammad Naameh Nasser an that tih an pawm a, hemi hnu hian Hezbollah helpawl hian a chhan letna atan Israel lamah Katyusha rocket leh Falaq rocket tam tak an kah chhuah bakah drone hmangin Israel chu an bei ta a ni.

Hezbollah hian Hamas an thlawp tih lantir nan Israel hi a kap ṭhin a, Israel chuan chhang let vein an inralsai ṭhin. An inkara indona a chhuah loh nan US leh France chuan hma an la reng bawk. Hezbollah hian Gaza-a beihpui thlaknaa inkahhai puan a nih hunah Israel an kah ṭhin chu an titawp ve dawn tih sawiin, indona chu duh lo mah se a ṭul a nih chuan hmachhawn erawh an hreh lo thung tih an sawi.