Pakistan : Punjab-ah social media platform ni 6 chhung hman khap

Pakistan sorkarin thla 4 chhung social media paltform X hman a khap tawh hnuah, Punjab province sorkar chuan thuchhuah thar siamin YouTube, WhatsApp, Facebook, Instagram leh TikTok te chu July 13 aṭanga 18 thleng hman khap a ni dawn tih a puang ve leh. Hetianga an tih chhan hi Muslim thla serh, Muharram laia anmahni deusawhna thil heng platform a tarlan a nih loh nana ti an ni.

Punjab province chief minister, Maryam Nawaz kaihhruai cabinet committee chuan social media platform hrang hrang khap tur hian thutlukna a siam a, Muslim-te deusawhna leh thudik lo Muharram laia thehdarh a nih loh nana ti an nih thu an puang. Punjab sorkar hian Pakistan-a sorkar dinglai, Shehbaz Sharif-a kaihhruai sorkar chu ni ruk chhung social media platform te khap lailawk turin thurawn a pe bawk. Muharram hi Muslim calendar-a thla hmasa ber niin kum khat chhunga thla serh an neih pali zinga pakhat a ni a, Muharram thlaah hian hian indo phal a ni lo.

Pakistan ramah hian social media hian dodal a hlawh hle a Pakistan Army Chief Gen Asim Munir chuan social media chu nunrawng tak nia sawiin 'digital terrorism' tia a hming vuah sakin dodal a ngaih thu a lo sawi tawh a ni. Pakistan deputy prime minister pawhin social media chu tiamchin awm loa hman khap a duh thu a lo sawi lang tawh bawk. Social media site X chuan Pakistan rama inthlanpui neihah thil dik tawk lo awm nia a tarlan avangin sorkar chuan hman a lo khap tawh bawk a ni. Imran Khan kaihhruai sorkar, kum 2022 kuma paihthlak a nih hnu khan Pakistan sipaite leh sorkar thar chuan social media lamah sawisel an hlawh hle a, Khan thlawptu social media activist tam tak sorkar chuan a man tawh bawk a ni.