Iran President atan Pezeshkian thlan a ni

Iran President thar thlanna, a thawh hnihnaah Masoud Pezeshkian chuan a khingpui Saeed Jalili lakah hnehna a chang. August thla tir lamah Iran President pakuana ni turin rinawmna thu tiam tira lak luh a ni ang.

President thlan thawh hnihnaah hian vote maktaduai 30 vel tlain Pezeshkian chuan vote mtd. 16.3 hmu a, Jalili hian vote mtd 13.5 a hmu ve bawk niin election thuneitute chuan an tarlang.

Iran President Ebrahim Raisi chu May thlaa helicopter chesuala a thih avangin Iran hian President thar thlanna hi an neih a ngai a, June 28 khan inthlan hi neih niin candidate pali zingah vote tla aṭanga 50% hmua hnehna chang an awm loh avangin vote hmu sang pahnih Masoud Pezeshkian leh Saeed Jalili te chuan inthlan an hmachhawn nawn leh a, Pezeshkian hian hnehna a chang ta a ni. Iran ṭhianṭha China, Russia leh India ram hruaitute chuan Iran president thar hi lawmpuina thu an thawn a ni.

President thar Pezeshkian hi kum 69 mi a ni a, heart surgeon niin Iran parliament-ah member a ni mek bawk. Pezeshkian hian mipuite chu hun harsa an tawh mek laia a lama ṭang tlat tura sawmin, khawvel ram dangten Iran an enhranna chu tihtawp a tum tih a sawi. Nuclear deal chungchangah khawthlang ramte nen inbiakna neih ṭhat leh a duh thu a sawi bawk. Pezeshkian hian Iran a Shiite rorel dan phung kalpui mek chu thlak danglam vak a tum lo tih a lo sawi tawh a, thutlukna pawimawh chu Iran supreme leader Ayatollah Ali Khamenei kutah a awm dawn a ni, a ti. Iran President hi ram hotu lu ber a ni lo a, thuneihna sang ber leh thutlukna tawp siamtu chu kum 35 chhung an ram hotu lu ber ni tawh, Ayatollah Ali Khameinei kutah a la awm vek a ni.

Iran president thar hian inthlan nawn lehnaah hian vote tla zawng zawng aṭangin 53.6% hmuin a khingpui Saeed Jalili hian 44.3% a hmu ve thung a ni. Inthlan thawh hnihnaah hian Iran mipui 49.8% in vote an thlak niin Iran Interior Ministry chuan a tarlang a, vote tla a ṭha lo hle. June 28 a inthlan hmasak zawk kha kum 1979 a Islamic Revolution hnua vote tla a tlem ber ṭum niin, Iran mipui vote nei zinga 39.9% chauhin vote an thlak nia tarlan a ni.