Bangladesh : Ramchhung tuilianin mi mtd 2 a nghawng

Bangladesh thuneitute chuan Inrinni khan thuchhuah siamin, ramchhungah tuilian vangin mi 8 an thi tawh a, mi mtd 2 chuang nunphung a nghawng mek tih an tarlang.

Bangladesh-ah hian lui kuang aṭangin tui a liam vangin hmun hrang hrangah tui a lian a, mi mtd 170 chenna ramah hian lui lian avangin tun hnaiah harsatna an tawk nasa hle. Sik leh sa inthlak danglam vanga ruah sur dan a danglam bakah, Himalayan vur a tui chak avangin lui tui hi a tam phah bawk. Sorkar chuan tuilian avanga mahni chenna hmun chhuahsan ngaite awmna tur chhawmdawlna-in za chuang an siam tawh tih a tarlang a, ramchhung hmar lama tuilian tuar na zual district-ahte eitur leh nitin mamawhte pek luh a ni tih a tarlang bawk.

Shahjadur-a lawng che sualah mipa naupang pahnih an thi tih police hotu pakhat Sabuj Rana chuan a sawi a, he lawnga chuang ve midang pasarihte chu vaukam lama inhleuhkaiin an him tih a sawi. Kurigram lam hmun pahnihah electric man vangin lawnga chuang mi pathum an thi tih tarlan a ni bawk. Hemi bakah hian tuilian kaihhnawih vang hian mi pathum an thi bawk a ni.

Bangladesh disaster management ministry secretary, Kamrul Hasan chuan,"Tuilian hian mi mtd 2 aia tam a nghawng mek a, ramchhunga district 64 awm zinga district 17 chuan tuilian hi an tuar a ni" a ti. Bangladesh hmar lamah tuilian hian zual lam a pan a rinawm tih Hasan chuan a sawi tel bawk.