Russia-a Voronezh region-ah emergency puang

Russia-a Voronezh region-ah Ukraine drone-in warehouse a kap fuh a, a kan zui avangin nimin khan state of emergency an puang.

Governor Alexander Gusev chuan drone-a beih an tawh avang hian mihring thi leh hliam erawh an awm lo tih a sawi a, mahse warehouse-ah kangmei nasa tak a chhuah zui avangin a chhehvela chengte chu sawn chhuah an ni tih a sawi.

Voronezh hi kum 2022-a Russia-in Ukraine hmarchhak lam a luahsak nena inri a ni a, Ukraine hian drone hmangin he bial chunga ralthuam dahna, square metre 9,000-a zau chu a kap fuh a ni. He warehouse-ah hian puakthei thil tam tak a awm avangin, a chhehvela chengte tan a hlauhawm thei dawn nia sawi a ni.

Ukraine drone kah chhuah vanga Voronezh bialin harsatna an tawh mek laiin, Russia chuan an sipaiten Ukraine khawchhak lam, Donetsk region-a khaw pakhat chu Inrinni khan an la tih an sawi ve bawk.

Russia Defence Ministry chuan Donetsk city aṭanga hmarthlang lam, km 30 vela hlaa Sokil khua chu an sipaite kuta a awm tawh tih a sawi, Ukraine nen an inbeih meknaah hma an sawn zel tih an tarlang.

Donetsk bialah hian hmun hrang hrangah Russia leh Ukraine sipaite hi an la inbei chhunzawm reng a, Ukraine chuan remna leh muanna awm a duh a nih chuan he bial aṭanga a sipaite la chhuak vek turin Russia president Vladimir Putin chuan a hrilh leh a ni.