Lebanon PM thar atan Mustapha Adib ruat

Lebanon khawpui, Beirut-a August 4-a chhiatna rapthlak thleng vanga August 10-a prime minister Hassan Diab leh a kaihhruai sorkarin banna an thehluh hnuah Thawhṭanni khan Mutapha Adib chu Prime Minister thar atan ruat a ni. 

Hassan Diab kaihhruai sorkar a ban hnuah hun eng emaw chen hruaitu thar ruat loin an awm a, France president Emmanuel Macron-a'n a nawr hnuah PM thar tur hi ruat a ni ta a ni. 

Macron chuan PM ruat a nih tak avangin sorkar thar pawh a din thuai a beisei thu a sawi.

Prime minister atana ruat thar, Mutapha Adib hi kum 48 mi a ni a, kum 2013 aṭang khan Germany-ah ambassdor a ni. Law leh political science-ah doctorate degree a nei a, Lebanon leh France-a university-ahte a lo zirtir tawh a ni. Lebanon PM hlui Najib Mikati adviser pawh a lo ni tawh ṭhin bawk. 

PM atana ruat a nih a pawmna thu, Preidential Palace-a a sawinaah, Adib chuan  an ram dinhmun thlirin ṭawng vak emaw, thil tiam vak vak leh duhthu sam hun a ni lo a, a taka hna thawh hun a ni, a ti. Hemi hnu hian tun thla tira Beirut-a thil puak na takin chhiatna a thlenna hmun ṭhenkhatte a tlawh nghal a ni. 

August 4-a Beirut lawng chawlhna hmuna ammonium nitrate ton 3,000 dawna tam puakin thil a tihchhiat kha US dollar tluklehdingawn 4.6 hu vel a tling niin World Bank chuan a sawi. He chhiatna thlenga thi hi mi 190 niin, mi 6,000 chuangin hliam an tuar a, mi 30,000 dawn chu chenna in nei loin an awm phah bawk.