Nightclub beihnaa thi te an sun

Pathianni-a Orlando, Florida-a gay nighclub-a kahhlumte sunna hun chu khawvel hmun hrang hrangah hman a ni.

Pulse nightclub-a silai pawngkah avanga thi hi mi 49 an ni a, hliam tuar eng emaw zat an awm. Silai hmetpuaktu, Omar Mateen chu police-ten an kaphlum ve nghal a ni.

Nightclub beihnaa thi te sunna hun hi France, Asutralia, UK leh Germany-ah pawh hman a ni. Mitthi te hriatrengna atan bati-te chhiin, pangpar-te an dahkhawm bawk.

US thuneitute chuan Omar Mateen hian silai a hmehpuah hma hian Islamic State (IS) firfiak pawl laka a rinawmna thute a sawi niin an tarlang. Mahse a thiltih hi IS pawl thupeka tih a ni tih finfiahna erawh a awm lo niin an sawi.

Pulse nightclub-a kal ṭhinte chuan Mateen hi he nightclub-ah hian a kal fo ṭhin a, a chang chuan a kil khatah ngawi renga ṭhuin amahin zu a in mai a, a chang chuan a zurui chu a bengchheng thei hle niin an sawi. Ṭhenkhat chuan gay dating apps aṭangin an lo hre tawh niin an sawi bawk.

Mateen-a pa, Seddique Mir Mateen-a chuan a fapa thiltih chu a dem thu sawiin, mi firfiak thiltih a ni, a ti. Seddique Mir Mateen chuan a fapa hian mahni anpui kawpte a huat theih em avangin he pawikhawihna hi a thlen ta nia a ngaih thu a sawi a, a fapa chetdan avang chuan ngaihdam a dil bawk.

US President Barack Obama chuan vawiin hian Orlando panin, pawikhawihna thlenna hmun hi a tlawh ang.