Israel-in Palestinian khua a hrekna thlahdul

Israel Defence Forces (IDF) chuan kar kalta Tel Aviv-a Israel mi pali kaphlumtu, Palestinian mi pahnih te chenna, West Bank-a Yatta khua a hrekna chu
a thlahdul.

IDF hian Israel mi pali-te kahhlum an nih hnu hian Yatta khaw luh leh chhuahna chu an kharsak nghal a, kum 15-25 inkar ni lo, Palestinian mite chu Yatta khuaa an kal duh a nih chuan phalsak a ni a, mahse sipaiten uluk takin an enfiah hmasa phawt a ni. Hei bakah hian West Bank leh Gaza Strip
aṭanga kal, Palestinian mi 83,000 chuang hnena permit a pek pawh a titawp lailawk bawk.

Israel sipaite chuan pawi≠khawihtute chenna inte chhinchhiahin an dap bawk a, khawchhunga cheng mi ṭhenkhat chu rinhlelh thilah man an ni bawk. Pawikhawihtute chi leh kuang, mi 240 hnenah Israel rama hnathawh phalna, work permit a pek pawh a sut nghal a ni.

Yatta khua leh Palestinian mite hrek an nih chungchangah US chuan Israel hi sawiselin, misualte thiltih avangin a hnam pum an tawrh tir chu ṭha lo a tih thu a lo sawi tawh a ni. Hetih lai hian Israel hruaitute chuan Palestinian Authority chu Israel mite chunga pawi khawih tura an mite fuihpawrhah a puh thung.