UN General Assembly president atan Fiji palai thlang

United Nations General Assembly (UNGA) president thar atan Fiji palai, Peter Thomson chu thlan a ni.

New York-a UN headquarters-ah inthlan neihah, Peter Thomson hian Cyprus palai Adrea Mavroyiannis chu a hneh. UNGA president lai Mogens Lykketoft, Denmark chu a thlak dawn a, September thlaa assembly session neih hunah UNGA 71st session president hna hi a chelh tawh dawn a ni.

June 13-a inthlan buatsaihah vote hi single ballot hmanga thlak a ni a, Thomson hian vote 94 hmuin a khingpui, Mavroyiannis hian vote 90 a hmu. Thomson hi Small Islands and Developing States (SIDS) group
aṭanga president of the General Assembly (PGA) ni thei hmasa ber a ni ang.

Thomson chuan a thlak tur, Lykketoft leh UN Secretary General Ban Ki-moon te chu ṭha taka a thawhpui zel tur thu a sawi a, hemi rual hian kumin kumtawpa Ban-a term a tawp hnuah amah thlaktu nu chu thawhpui zel a tum tih a sawi bawk. UN Secretary General thar tur hi hriat chian la ni lo mah se, hmeichhia awm ve tawh ngei se tia nawrna a na hle a ni.

UN General Assembly hian a ṭum khatna atan major committee paruk zinga pakhata hruaitu turin Israel a thlang a, hei hi Palestinian leh Arab ramte chuan an duh lo nghal hle. Member ram 193-ten secret ballot hmanga vote an laknaah Israel thlangtu hi 109 an awm a,a duh lo lamah vote tla a awm lo. Member 23 erawh an hai thung a, vote thi 14 awmin, 43 chuan Israel nominate tu, Western European and Others gourps aṭangin ram dang an duh zawk thu an sawi.

UN-a Israel ambassador Danny Danon chuan committee chairman atana Israel thlan a ni chu thil chhinchhiah tlak tak a nih thu leh, lawmawm a tih thu a sawi.

Mahse Palestinian ambassador Riyad Mansour chuan Israel thlan a ni chu an duh loh thu sawiin,Western European and Others gourps chu he dinhmun chelh tura tling zawk, international law palzut duh lo ram nomiate zawk tura an duh thu a sawi.