Yemen-a military camp beihnaah mi 60 thi

Yemen hel, Iran-in a thlawp Houthi te chuan Inrinni khan an ram chhim lama military training camp an bei a, sipai mi leh sa 60 thiin midang tam takin hliam an tuar bawk. 

Houthi ho hian Marib khuaa military camp beih nan hian ballistic missile leh drone-te an hmang nia sawi a ni. Kum 2014 khan Houthi hian sorkar paihthlain, an ram khawpui Sanaa leh hmarlama bial tam zawk chu an awp zui a ni. President Abd-Rabbu Mansour Hadi pawh chhim lama khawpui, Aden-ah tlanchhain heta ṭang hian sorkar a din thar leh a ni. Saudi Arabia kaihhruai Arab ṭangrual ramte chuan President Hadi kaihhruai sorkar hi thlawpin, Houthi hel lakah hian beihpui an thlak zui reng bawk. 

Houthi helpawl hi Iran-in a puih avanga Iran duhdan ang anga cheah puh an ni ṭhin. Mahse anni lam chuan hei hi phain, an rama eirukna hluar lutuk umbo tuma bei an ni tih an sawi thung.