WHO-in inthlahdah lo turin ngen

World Health Organization (WHO) chuan eng ram mahin hripui leng chu a reh ta angah an lantir tur a ni lo tiin, hri darh zel tur venna atana ruahmanna fel tak awm si loa khuahkhirhna siamte hlih ngawt chu chhiatna nasa zawk hmahruaitu a ni thei a ni, a ti. 

WHO director general Tedros Adhanom Ghebreyesus chuan coronvirus a len tirh aṭangin thla riat a ni tawh a, hei vang hian mi tam tak chuan inkharkhip leh khuahkhirhna siamte chu ningin, nunphung pangngaia anga awm leh an duh tawh a ni, ti. "Naupangte chu dan pangngai anga school-te kaltir a, mipuite pawh an hnate an thawh chhunzawm theih vek kan duh a, mahse hei hi fimkhur tak leh, kan himna tur ngaihtuaha tih a ngai," tiin a sawi. Hri leng chu a reh ta angin eng ram mahin an lantir tur a ni lo a, a dik takah chuan he hri leng hi a darh awlsam hle a, khuahkhirhna siam loa inthlahdah mai chi a ni lo, tiin  Ghebreyesus chuan a sawi. 

Kenya ramin Covid-19 vanga inkhuahkhirhna a hman ṭhenkhatte a thlahdul avangin WHO chuan la fimkur hle turin a chah.

Kar thum chhungin Kenya ramah hian hri kai nia rinhlelh leh hri kai an tlak hniam thu sorkar chuan a tarlang a, mahse hei hi WHO chuan ngaihṭhat phahna atan hmang lo a, inkhuahkhirhna thlahdul phahna tur atana pawm tlak a nih loh thu a tarlang.

WHO chuan Kenya rama hri kai tlakhniamna chhan ber chu sorkarin laboratory test a neih tlem vang niin a sawi. Hei hi ram puma hri kai tlakhniamna tehfung atan hman a him lo niin WHO chuan a tarlang zui bawk. Nimina health minister tarlan dan chuan an rama sample lak tawh zat hi 4,54,406 a ni.