Venezuala-in eptu member ṭhahnem tak ngaidam

Venezuala president Nicolas Maduro chuan eptu pawl member an man, mi 110 te chu ngaihdam an nih thu Thawhṭanni khan a sawi a, an zingah hian legislator 20 an tel a ni.

Heng mite ngaihdam an nih chhan hi December 6-a an ramin inthlanpui (parliamentary election) a hmachhawn dawn vang nia sawi a ni. Hetih lai hian  eptu pawl hruaitu Juan Guaidó chuan inthlan hunah hian dik lo takin an ram sorkar chuan hma lak a tum niin a sawi a, inthlan boycott an tum thu a sawi thung. 

Kum 2018-a Venezuela president thlanna neihah khan pesident ni lai Nicolas Maduro chu thlan tlin a ni leh a, mahse Guaido chuan he inthlanna hi a dik tawk lo nia sawiin, inthlan huaihawt ṭhat leh a ngiat a ni. Hemi hnu hian interim president-ah a inpuang zui a, hei hi US leh ram ṭhenkhat chuan an pawmpui zui bawk. Hei vang hian tualchhung politics buaina pawh a thlen phah a ni. 

Hun rei tak chhung tualchhung politics buaina thleng vangin mipuiten harsatna an tawk nasa hle a, nikum khan UN chuan Venezuela mipui zinga maktaduai 2.8 vel chu chhawmdawl ngaiin an awm mek niin a sawi. Ei leh in bakah damdawi lama in enkawlna lam thlengin harsatna an tawk a, cancer, diabetes leh HIV veite enkawlna tur damdawi duh khawp hmuh tur a awm lo tih UN chuan a sawi bawk.