Japan leh Philippines sipaite thawh hona tur inremna ziak

Japan leh Philippines sipaite thawh hona tur, Reciprocal Access Agreement chu nimin khan Philippines defence secretary Gilberto Teodoro leh Japan foreign minister Yoko Kamikawa te chuan hming ziah hnanin an pawm.

Inremna ziah thar hian ram pahnih sipaite chu joint military exercise nei tura ram pakhat zawk chhunga tirhluh a phalsak a, he hunah hian sipaite hian indo nunchan an zir thei dawn a ni. He inremna hi ram pahnih legislature in a pawm hnuah tih nun ṭan a ni ang.

Japan foreign minister Kamikawa chuan an inremna ziah thar chu ram venhim kawnga Philippines nena an inkar tinghet zualtu a nih a beisei tih a sawi. Yoko Kamikawa leh Japanese defence minister Minoru Kihara te chuan inremna ziah zawh a nih hnuah Philippines nena an inkara thawh hona ṭhazawk an neih theih dan tur thuneitute chu an sawipui leh bawk.

Philippines hi Japan-in Asia ram zinga defence pact an ziahpui hmasa ber niin, hetiang inremna hi Australia (2022) leh Britain (2023) te an lo ziahpui tawh a ni. Asia-a ram ṭhangduang tak China leh khawvel ramdang te do rawn North Korea laka inven nan Japan hian Asia ramdang thawhpui tur a zawn bakah a ram venhim nan ralthuam ṭha zawk neih belh a tum mek a ni. Hemi bakah hian South China Sea-a Philippines ram hauh chin China laka an humhim theih nan Japan leh Philippines inremna ziah hi a pawimawh tel bawk.