'Pathian chauhin inthlan chuh lo turin min hmin thei' - Joe Biden

US President thlanna neih turah, Democrats candidate leh President ṭanglai, Joe Biden chu June 27-a Republican candidate, Donald Trump nena presidential debate an neihah a chet ṭhat loh avangin an party mi lah sa ngei aṭangin inhnukdawk tura duhtu an tam hle.

Hetih lai hian President Biden chuan inhnuhdawh a tum loh thu a lo sawi tawh a, kar liam ta Zirtawpnia interview a neihah pawh sawi nawn lehin, "Pathian hi a lo chhuk a, 'Joe, inhnukdawk mai rawh' min ti a nih chauhin ka inhnukdawk ang," a ti a, hemi rual Pathian chu van aṭangin a rawn chhuk mai dawn si lo, tiin a sawi zui.

Kum 81 mi, Biden hian debate-a a chet ṭhat loh chungchangah a chauin, a inbuat-saihna a ṭha tawk lo niin a sawi a, midang thiam loh ni loin ama thiam loh a ni tih a pawm tih a sawi. Hemi rual hian President mawhphurhna chelh tur hian a la chak ṭha tawk a, Republican candidate Donald Trump hneh ngei chu a tum ber a nih thu a sawi nawn leh.