Thla 12 chhunga khawvel pum lum belhnain 1.5°C a pel : C3S

Copernicus Climate Change Service (C3S) chuan thla 12 chhunga khawvel lum zawng chawhrualah a lum belhna chuan 1.5° C a pel tih nimin khan an puang. C3S hian June thla khan khaw lum hian ziaawm lam a la pan lo a, a zawna thla 13-na atan khawlum hian zual lam a pan tih an tarlang tel bawk.

C3S chuan thla 12 chhunga khawvel lum zawng chu chawhruala a san ber ṭum a ni tih tarlangin kum 1991-2020 inkara khawvel lum zawng chawhrual aiin 0.76 degree celsius in a lum zawk a, kum 1850-1900 (pre-industrial average) aiin 1.64 degree celsius in a lum zawk tih an sawi bawk. Hemi bakah hian kumin June thla chu kum dang zawng zawnga June thla aiin a lum zawk tih an tarlang tel bawk.

Paris Agreement-in tun kum zabi chhunga khawvel lum zawng 2 degree Celsius aia san belh tir loh a tumna chu thla 12 chhunga 1.5 degree celsius-a a san belh avang hian a hlawhtlin mai loh a hlauhawm ta hle. Paris Agreement hnuaiah hian ram hrang hrangte chu khawvel a lum belh zel loh nan, khawvel tilumtu boruak bawlhhlawh (GHG) pe chhuak tam lo turin an intiamkam a, India pawhin kum 2030 hmain boruak bawlhhlawh a pek chhuah 40% (base year 2005) a tihtlem a tiam a ni.