Nigeria khawpuia doctor-ten nawrh huaihawt

Nigeria khawpui, Abuja-a resident doctor-te chuan April thla aṭanga allowance pek an nih loh avanga lungawi loin, nimin aṭang khan tiam chin awm loin nawrh an huaihawt. 

Assocation of Resident Doctors chuan coronavirus leng mekah hospital leh treatment centre hrang hranga thawk doctor-te hnenah allowance pek a tiam chu a tihlawhtling lo niin an sawi. Sorkar hnenah a thutiam anga allowance pe tura phutin ni 14  hun an pe a, kum 2016 aṭanga promotion arrear a la pek loh pawh pe turin sorkar an phut tel tih an sawi bawk. 

An thil phut a hlawhtlin hma chuan an hna an thawh chhunzawm tawh dawn lo tih an sawi a ni. 

Nigeria-ah hian Covid-19 kai 54,008 an awm tawh a, an zinga 41,638 chu enkawl dam tawh niin, mi 1,013 in an thihpui tawh. Sumdawnna hmunpui, Lagos bakah an ram khawpui, Abuja hi hri kai tam zualna hmun a ni.