AirAsia QZ8501 a tla, zawn mek zel a ni
AirAsia khualzin phur thlawhna, Indonesia aṭanga Singapore pana thlawk chu December 28,2014 khan chin hriat lohin a bo, tuipuiah a tla ni-a rin a ni. Mi 162 chuanna AirAsia thlawhna hi December 28 (Pathianni) zing dar 5:20 khan Indonesia-a Surabaya khua-a Juanda International Airport aṭangin Singapore panin a thlawk chhuak a, minute 45 vel a thlawh hnuah biak pawh theih loha awmin, a awmna chin hriat zui a ni ta lo a ni. He thlawhna khalhtute hian chin hriat loha an awm hmain, khaw chinin a zir loh avanga an zin kawng tihdanglam an duh thu an sawi a, hei bak hi chu harsatna an tawh thu lei lama awmte an hriattir hman loh avangin tuipui-ah an tla ni ngei a rin a ni. He thlawhna bo-ah hian khualzin mi 137 chu puitling an ni a, naupang 17 awmin, thlawhna-a chuang tam ber chu Indonesia mi an ni a, British leh Malaysian bakah Singapore mi leh South Korea mi 3 an tel bawk a, thlawhna khalhtu mi 2 leh hnathawktu mi 5 awmin thlawhna khalhtu zinga 1 hi France mi a ni.
AirAsia thlawhna bo hi tuipuiah a tla tih hriat chian a ni tawh a, National Search and Rescue Agency chuan Borneo vau kam hnaih, tuipui chhuatah thlawhna tla nia an hriat hi hmuh a nih tawh thu an sawi a, helai hmun hi ruang leh thlawhna keh them an hmuhna bul lawk a ni nghe nghe a, khawl hmangin tuipui chhuat, feet 150 vela th<kah thil dum lian tak, thlawhna ni ngeia hriat hi hmuh a ni a, a en fiah tur hian khaw awm dan an ngaichang leh phawt dawn a ni. AirAsia company-in thi ta chhungte hi zangnadawmna hmasa a p>k thuai tur thu a sawi bawk.
Indonesia search and rescue teams te chuan Nimin Pathianni khan AirAsia thlawhna kehthem ni ngeia hriat thilkeh panga tuipui chhuatah an hmu tih chief Fransiskus Bambang Soelistyo chuan a sawi. Khawchhia avangin chhanchhuahna hna hi thawhchak a harsa hle a, ruang 31 te chu hmuhchhuah tawh an nih thu Soelistyo chuan a sawi bawk.
AirAsia thlawhna chetsual hma hian, 2014 khan thlawhna 2-in vanduaina an lo tawk tawh a, March thla khan mi 23 chuanna, Kuala Lumpur aṭanga Beijing pana thlawk, Malaysia Airlines thlawhna chu chin hriat loha boin tun thlengin he thlawhna hi a chanchin hriat zui a ni lo a, July thla pawh khan Malaysia Airlines thlawhna tho, MH17 chu Ukraine-ah kahthlak niin thlawhna-a chuang mi 298 chu an thi vek a ni.