Khualzin phur Lawngah kangmei a chhuak
December 28 khan Greece aṭanga Italy pana kal, khualzin phur lawngah kangmei a chhuaka, mi 10 a thi a, mi 38 vel chin hriat lohin an awm nia hriat a ni; lawngah hian mi 478 an chuang a ni. Norman Atlantic ti-a an vuah, khualzin phur lawng hi Greece-a lawngchawlhna hmun pakhat, Patras aṭanga Italy-a Ancona pana a kal laiin Corfu thliarkar bulah a kang a, lawng a kan hnu hian lawnga chuangte chu an chiai nasa hle nain, Italy-a tuipui kam vengtuten lawnga chuangte chhanchhuak tura theihtawp an chhuah zui nghal avangin, thi leh hliam an tlem phah ni-a sawi a ni. Coast Guard hotu, Admiral Giovanni Pettorino chuan, lawnga chuangte chhanchhuah tuma an beihnaah hian sipai zingah pawh hliam an awm nual niin a sawi a, thlawhna khalhtu zinga mi, Maj Antonio Lanev chuan, lawng kang hi a kh<k nasat avangin an tum angin hna an thawk ṭha thei lo niin a sawi bawk. Lawnga chuang zinga a tam zawk chu chhanchhuah an nih hnuah a bul hnai lawngah dah an ni a, kangmei chhuak pawh ṭhelh mih tawh niin, hliamte chu damdawi in panpui an ni tawh bawk a, tuifawn vanga lawng a pil loh nana a bul hnaia lawng-ten theihtawp an chhuah avangin chhiatna nasa tak thleng thei pumpelh a ni hlauh niin chhanchhuah hna thawktute chuan an sawi.