Mohammad Kaiser thiam loh chantir a ni
Bangladesh ram Minister hlui, ram zalenna sual laia mi tam tak thihnaa mawhphurtu-a puh, Syed Mohammad Kaiser chu thiam loh chantir a nih hnuah thi tura tih a ni. Kum 73 mi, Syed Mohammad Kaiser hian kum 1971-a ram zalenna sual lai khan zalenna duh lo pawl a din a, he pawl hian November ni 15-ah Brahmanbaria biala khaw 22 chu sipaite nena beiin, civil mi, pawi sawi lo 108 chu Hindu an nih avangin thah an ni a, hmun danga an pawi khawihnaah pawh mi 50 vel an thi bawk a, hengah hian Kaiser hi pawi khawih dan ruahmantu-a puh a nih avangin, International Crimes Tribunal chuan thiam loh a chantir hnuah thi tura hrem a nih thu a puang a ni. International Crimes Tribunal hian Bangladesh rama Muslim sakhaw behchhan party Jamaat-e-Islami Party hruaitu mi 20 vel a hrem tawh a, heng zingah hian tuna eptu pawl lian ber, Bangladesh Nationalist Party hruaitu ṭhenkhat pawh an tel a, thi tura hrem hnuhnun ber, Kaiser hi Jatiya Party hruaitu hlui a nih avangin, eptu party mite hrem an nih chungchangah hian BNP leh Jatiya Party chuan International Crimes Tribunal chu sawrkarin party dangte sawisakna atan hmanrua-ah a hmang niin an sawi a, thu dik hai lan tum loin court hian eptu hruaitute tihchhiat chu a tum ber niin an sawi a ni.