Israel-in West Bank tui supply tihtawpsak

Israel national water company chuan West Bank hmun tam zawka tui a suppy a titawp a, Palestinian mi tam tak, Islamic thla thiang≠hlim Ramadan hman mekte chu tui thianghlim in tur mumal nei loin an awm mek.

Palestinian khaw hrang hranga tui supply-tu, Mekorot chuan Jenin municipality, Nablus thingtlang khaw hrang hrang, Salfit khua leh a chhehvel biala tui a pek ṭhin chu a titawp a ni.

Palestinian Hydrology Group executive director, Ayman Rabi chuan hmun ṭhenkhatah chuan tui hi ni 40 chuang an dawng tawh lo niin a sawi. "Mipuite chuan tui phur motor aṭangin tui an lei a, ṭhenkhat chuan dil amite an chawi tawh a ni" a ti. Chhungkaw tam tam chuan ni khatah tui litre 3-10 vel chauhin ringin an awm tih a sawi.

Jenin khawpuiah hian mi 40,000 chuang an cheng a, he khawpui tana tui pek ṭhin hi a zahve titawp a ni. Khaw lum lai anih avangin tui harsatna avanga chhiatna thleng a awm a nih pawhin Mekorot chu a mawhphurtu a nih tur thu Rabi chuan a sawi.

UN chuan Palestinian rama chen zinga a tam zawkten ni khata tui an mamawh zat hi a tlem berah mi pakhatin litre 7.5 angin a chhut a, mahse hmun ṭhenkhat lum zual laiah chuan hei ai hian a la tam zawk a ni. Kum 1967-a Israel-in West Bank leh Gaza Strip a luahsak aṭang khan Palestinian mite hnena tui pek tur hi a bithliahsak a ni.

West Bank-a Israel mi chengte chuan Palestinian-te aiin tui an dawng hnem zawk a, Israel mi pakhatin ni khata tui litre 350 a dawn laiin, Palestinian mi chuan litre 60 a dawng ṭhin.