Tokyo Governor Yoichi Masuzoe a bang

Tokyo Governor Yochi Mazuzoe chu official fund a hman danah sawiselna leh puhna hrang hrang a awm avangin nimin khan a bang.

Yoichi Masuzoe hi sum hmang nasaah puh a ni a, holiday a hmanna leh, a fate lehkhabu leisakna atante official fund hmangah puh a ni a, bang tura nawrna pawh a nasa hle. Nimin chawhnu khan assembly-ah fiahna paltlang tura tih a ni a, mahse he hun hman a nih hma hian Governor a nihna aṭangin a bang ta a ni.

Inthlan dawna hminghliauna awm lo rorelna dik tiamtu, Masuzoe chuan dan bawhchhiat a neih loh thu a sawi a, hemi rual hian sum a hman nasat thu erawh a pha lo thung.

April thla khan Masuzoe hian a official car chu Tokyo chhim lama kartawp chawlh hmang tura a kalna atan a hmang ṭhin tih sawichhuah a ni. Hei bakah hian official thila a zinchhuahna sum a hmang nasa a, chhungkua lenchhuahna atan leh thawmhnaw leina a tante sum a hmang nasa nia puh a ni. Mahse Masuzoe chuan a thawmhnaw lei tam tak chu research kaihhnawih thil niin a sawi. Dik lo taka sorkar sum a hmang nia an puhte chu pek kir leh vek a tum thu a sawi bawk.